Ўш шаҳри ва Ўш вилояти ҳудудида ташкил этилган этношаҳарчаларда VI Бутунжаҳон кўчманчилар ўйинларига муносиб тайёргарлик кўрилгани яққол намоён бўлмоқда. Ҳар бир масканда меҳмонларни кутиб олиш, миллий маданиятни намойиш этиш ва байрамона муҳит яратиш учун барча зарур шароитлар яратилган.

Этношаҳарчаларга ташриф буюрган меҳмонларни миллий мусиқа, рақслар ва кўтаринки кайфият қарши олмоқда. Турли миллат вакиллари бир майдонда жам бўлиб, қирғиз халқининг бой маданияти, урф-одат ва анъаналари билан яқиндан танишмоқда, биргаликда рақсга тушиб, унутилмас таассуротлар ва самимий лаҳзаларни баҳам кўрмоқда.

Ўш шаҳри ва Ўш вилояти маъмуриятларининг Кўчманчилар ўйинларига пухта тайёргарлик кўргани, этномаданий дастурларни мазмунли ташкил этгани ва меҳмонлар учун қулай шароит яратгани ушбу ҳудудлардаги байрамона муҳитда яққол акс этмоқда. Бу эса Кўчманчилар ўйинларининг нафақат спорт, балки халқлар дўстлиги, маданиятлар мулоқоти ва миллий қадриятларни кенг тарғиб этувчи йирик халқаро тадбир эканини яна бир бор намоён этмоқда.