Мавлуда Азимова,
Ўзбекистон Республикаси Андижон вилоятининг Балиқчи туманида туғилган. Андижон Давлат Университетининг мактабгача таълим факультети талабаси. 2015 йилда «Буюклар биз томонда» номли илк китоби чоп этилган. Республика ёш ижодкорларининг Зомин семинари иштирокчиси.
ЎЗБEКИСТОН
Қўлинг қадоқ, дилинг яра,
Юрагинг қон бўлди фақат.
Болаларинг оч наҳору
Зорлигинг нон бўлди фақат.
Терган ҳам сен, берган ҳам сен,
Ҳам ўғрию мерган ҳам сен.
Томларгача пахта экиб,
Кечганинг жон бўлди фақат.
Дўппингда сув тошиб чиқдинг,
Далалардан ошиб чиқдинг,
Тинмай боғлар яратдингу
Сўнг пушаймон бўлдинг фақат.
Мана ҳурлик замон келди,
Озод ҳалқим омон келди.
Минг синовлар келса ҳамки,
Ўзбекистон бўлдинг фақат!
Ўзбекистон бўлдинг фақат!
АЙЛАНАЙ
Бир илиқ сўз айтмоқлигим бор,
Бир бор айтсам, бошланар чаман.
Қуш бўлсам ҳам қайтмоқлигим бор,
Кўзларингдан айланай, Ватан!
Ҳаётимга киради нурлар,
Сўнг, ўзимни дейман мардона.
Қадамингдан ўстирсанг гуллар,
Изларингдан айланай, она!
Оппоқ қалблар жам бўлган давра,
Бор синовлар чиқолмас енгиб.
Сен доялик қилганинг – ўғил,
Қизларингдан айланай, севги!
Қуёш деган юртда яшайман,
Тирикманки ёнсам умрбод.
Яша дея юзимга қўйган,
Юзларингдан айланай, ҳаёт!
ОНА КEТАЯПТИ
Бола кулиб турар бепарволарча,
Столга бош қўяр киприги титраб.
Онаси кетяпти девоналарча,
Уйқусиз кўзини кетмонга тираб.
Минг йиллик чинорлар ўзгаргани йўқ,
Дунёда қолмаган бошқа ғам ташвиш.
Она боласидан жуда кўнгли тўқ,
Унга баҳор дея ўтказмоқда қиш.
Ота кетиб қолган номсиз жойларга,
«Номи ўчсин!» дея қарғайди она.
Ҳар тун соғинганин айтади ойга,
Ҳар тонгда ўзини атар мардона.
Илтимос, болакай, кулма ундайин,
Саккиз соат уйқу - санғиди тонгда.
Столга китоб қўй, шунда бошингни
Кўкларда кўрасан ушбу Ватанда.
Ажинга жой йўқдир онанг юзида,
Дили порламоқда дил изҳорликка.
Ҳар тонгда қуёшни уйғотиб қўйиб,
Онанг кетаяпти мардикорликка.
ДАДАЖОН
Менга дунё меҳр тутиб турса ҳам,
Кўздаги ёшларим оқади ҳар кун.
Кулгунгиз - мен учун қувончдир ҳар дам,
Жуда кўп қийналиб кетяпман, дадам.
Билмадим, ахир бу қийинчиликми?
Сиз ҳар кун чекасиз шундай жафони.
Оламан бахтзорда биринчиликни,
Аммо дил қаердан топсин вафони.
Сизни соғиняпман, соғинчим чексиз,
Иқрорим бунчалар бўлмас ҳеч қачон.
Қизим энг бахтиёр қиз бўлар, дебсиз,
Сиз бор мен дунёга бахтман, дадажон.
Мавлуда Азимова